«كوممەرتسيالىق ەمەس ۇيىمدار تۋرالى» قازاقستان رەسپۋبليكاسىنىڭ زاڭىنا سايكەس ۇكىمەتتىك ەمەس ۇيىمدار جىل سايىن 31 ناۋرىزعا دەيىن ۋاكىلەتتى ورگانعا, ياعني قوعامدىق دامۋ مينيسترلىگىنە وز قىزمەتى تۋرالى ەسەپ بەرۋگە مىندەتتى. ەگەر ەسەپ بەرمەگەن جاعدايدا, الدىمەن ەسكەرتىلەدى, ودان دا ناتيجە بولماسا, 25 ايلىق ەسەپتىك كورسەتكىش كولەمىندە ايىپپۇل سالىنادى نەمەسە قىزمەتى 3 ايعا توقتاتىلادى. بۇل تۋرالى وبلىستىق ىشكى ساياسات باسقارماسى باسشىسىنىڭ مىندەتىن اتقارۋشى زاۋرە بايمەنوۆا حاباردار ەتتى.
«ەگەر ۇكىمەتتىك ەمەس ۇيىمدار ۋاكىلەتتى ورگاندارعا ەسەپ بەرمەگەن جاعدايدا ولار گرانتتار مەن سىياقىلار ءۇشىن وتكىزىلەتىن كونكۋرستارعا قاتىستىرىلمايدى. بۇگىندە وبلىستا تىركەلگەن 867 ۇكىمەتتىك ەمەس ۇيىمنىڭ 586-ى عانا جۇمىس ىستەيدى. ولاردىڭ بارلىعىنان دا وسى ءۇش ايدا قىزۋ قيمىل كۇتەمىز» دەدى زاۋرە انۋاربەكقىزى.
Infonpo.kz سايتى - ۇكىمەتتىك ەمەس ۇيىمدار ءۇشىن اقپاراتتار جينايتىن دەرەكقور عانا ەمەس, ول ۇيىمدار ءۇشىن اقپاراتتار الماسۋ, ارالاسۋ الاڭى دا. وبلىستىق «گرين» ازاماتتىق اليانسى» قوعامدىق قورىنىڭ ءتورايىمى دينارا وتەباەۆانىڭ ايتۋىنشا, وبلىستاعى ۇكىمەتتىك ەمەس ۇيىمداردىڭ رەسۋرستىق ورتالىعى ولارعا كەڭەستەر بەرىپ, ادىستەمەلىك قولداۋ كورسەتىپ وتىرادى. وتكەن جىلى دەرەكقور مالىمەتتەرى باعىتى بويىنشا 86 ۇكىمەتتىك ەمەس ۇيىمعا كەڭەس بەرىلگەن ەدى, بيىل وسىنداي كومەك العاندار سانى 156 بولدى.
«دەرەكقورداعى مالىمەتتەر ۇكىمەتتىك ەمەس ۇيىمدار اراسىندا بايلانىستى نىعايتادى, ارىپتەس تابۋعا يتەرمەلەيدى. مىسالى, دەرەكقورداعى اقپاراتتاردىڭ ارقاسىندا ماڭعىستاۋ وبلىسىنداعى ارىپتەستەر بىزگە شىقتى, ۇكىمەتتىك ەمەس ۇيىمدار الەۋەتىن كوتەرۋ ءۇشىن قازاق تىلىندە شارا وتكىزۋگە ۇسىنىس جاسادى» دەيدى دينارا قايىربەكقىزى.
ۇكىمەتتىك ەمەس ۇيىمدار ءوز جۇمىسى تۋرالى ءۇش ايدىڭ ىشىندە ەسەپ بەرسە, الدا بولاتىن كونكۋرستارعا دا ۋاقىتىندا قاتىسادى, جۇمىسى جاندانادى دەگەن ءسوز.
ءنازيرا جارىمبەت,
«ەگەمەن قازاقستان»
قوستاناي